عروسه بالغلط انجي الخطيب
ـ حاضر يا سيادة الحارس. ابتسم. ـ الحارس ده بيشتغل من غير مرتب. ـ أمال إنت مستفيد إيه؟ بصلي لحظة، وبعدين قال بهدوء: ـ لسه بحاول أعرف. قلبي دق أسرع، لكني ركبت العربية من غير ما أرد. وصلنا المخزن القديم، وكان المكان مهجور، حواليه أرض زراعية وقنوات مية صغيرة.
كريم كان واقف قدام الباب، ومعاه راجل كبير شوية، أول ما شفته الحاج صبري قال بصدمة: ـ منصور! منصور ابتسم ابتسامة باهتة. ـ أهلًا يا أخويا. الحاج صبري قرب منه. ـ إنت إيه اللي جابك هنا؟ منصور رد: ـ الحقيقة يا صبري. الحقيقة اللي إنت دفنتها سنين.
كريم رفع إيده بظرف. ـ قبل ما حد يتكلم، أنا عايز أقول إن كل اللي حصل كان بسبب الطمع، وإن فيه ناس كتير شاركت فيه. سليم قال: ـ اتكلم. كريم بص للحاج صبري وقال: ـ عمي منصور كان عارف إن فؤاد بيزوّر الحسابات، وكان بياخد نصيبه من الفلوس اللي بتطلع من الشركة.
ولما عماد اكتشف الموضوع، قرر يفضحهم. الحاج صبري بص لمنصور بعدم تصديق. ـ الكلام ده صحيح؟ منصور سكت. كريم كمل: ـ ولما عماد رفض يسكت، بدأوا يضغطوا عليه عشان يوقّع على ورق يحمّل نفسه المسؤولية. لكنه رفض. أنا كنت واقفة مكاني، وقلبي بيدق بعنف.
ـ وإيه اللي حصل بعد كده؟ كريم بصلي، وبعدها نزل عينه. ـ بعد الحادثة اللي مات فيها عماد، فؤاد قال إن المشكلة اتحلت، وإن محدش هيقدر يثبت حاجة. حسيت الدنيا بتلف بيا. ـ إنت بتقول إيه؟! إنت بتلمّح إن أبويا اتقتل؟
سليم اتحرك ناحيتي، لكنه ما لمسنيش، واكتفى إنه وقف جنبي. منصور قال بسرعة: ـ محدش قال إن الحادثة كانت مدبرة. كريم رد عليه: ـ بس إنت كنت عارف إن فؤاد هدد عماد قبلها بيومين! منصور رفع صوته: ـ أنا ما كنتش أعرف إنه هيوصل لكده!
الحاج صبري كان واقف كأنه مش قادر يتنفس. ـ إنت أخويا يا منصور… إزاي تسكت على ظلم صاحب عمرك؟ منصور نزل عينه. ـ كنت جبان. خفت أخسر كل حاجة، ففضلت ساكت. كريم رفع الظرف. ـ أنا معايا نسخة من مراسلات فؤاد، وفيها تفاصيل عن الفلوس اللي اتسرقت، وكمان أسماء الأشخاص اللي كانوا بيساعدوه.
المحامي، اللي كان متخفي بعيد عن المكان مع الضابط، كان مستني الإشارة. لكن قبل ما نقدر نتحرك، ظهر اتنين رجالة من ورا المخزن. واحد منهم مسك كريم من دراعه، والتاني حاول ياخد الظرف. كريم صرخ: ـ سيبوني! إنتوا بتعملوا إيه؟! سليم اندفع ناحيتهم، وأنا رجعت لورا وأنا بصرخ.
